د سره صلیب نړیواله کمېټه: په افغانستان کې د اوړو بیې ۴۷ سلنه لوړې شوې

کابل (پژواک، ۲۰ غبرګولی ۱۴۰۱) : د سره صلیب نړیواله کمېټه وايي چې د تېرو څو میاشتو راهیسې په  افغانستان کې د اوړو بیې نږدې ۴۷ سلنه لوړې شوې دي.

دغې نړیوالې کمیټې دا څرګندونې په داسې حال کې کړې ، چې د افغانستان په ډېرو برخو کې د غنمو فصل ټول شوی او تازه بزګرو درمندونه اخیستي دي.

د افغانستان ګڼو ولایتونو کې د غنمو او اوړو بیې په اوسني موسم کې- دې ته په پام چې د غنمو فصل ټول شوی وي، پرتله ییز ډول ارزانه کېږي. خو برعکس سږ کال نرخونه پورته ختلي دي.

په افغانستان کې د سره صلیب نړیوالې ادارې ویاند  لوشین کرسټین په ټویټر کې لیکلي : “د بانکي سیستم پرځېدو، د نغدو پیسو کموالي او د ګټې وټې له لاسه ورکول” هغه څه دي چې په ډراماتیک ډول یې پر خلکو اغېز کړی او له همدې امله ګڼې کورنۍ لومړني توکي نه شي برابرولی. ”

Over the past months, the price of wheat flour increased by 47% in #Afghanistan.

The effects of a paralyzed banking system, lack of liquidity, loss of income, are dramatically impacting the ability of families to provide for themselves and meet their basic needs.
📷archive 1999 pic.twitter.com/ZcLpyyUhD0

— Lucien Christen (@LucienChristen) June 9, 2022

تر دې مخکې سور صلیب ویلي وو، اوسمهال څه باندې ۲۴ میلیونه افغانان بشري مرستو ته اړتیا لري او د خوراکي توکو د بیو لوړېدو د دغو اړو خلکو ژوند لا سخت کړی دی.

د افغانستان په ډېرو ولایتونو کې تازه د غنمو فصل ټول شوی، خو د یو من غنمو بیه تر ۳۵۰ افغانیو رسېدلې

څو میاشتې وړاندې د افغانستان په بازارونو کې یوه بوجۍ اوړه په ۱۴۰۰ افغانۍ پلورل کېده خو اوس همغه بوجۍ اوړه تر ۳۰۰۰ افغانیو خرڅېږي.

په کابل ښار کې د خوراکې توکو د سوداګرو اتحادیې رییس زمري صافي تیره اونۍ پژواک ته ویلي وو، چې په عمده ډول د ۴۹ کیلوګرامه قزاقي اوړو بیه له ۲۸۰۰ څخه ۲۷۰۰ افغانیو پورې خرڅیږي.

نن د تېرو اوو ورځو په نسبت د اوړو، غوړیو او هندي بورې بیې ټيټې شوې دي

دا په داسې حال کې ده، چې تېره میاشت داسې رپوټونه خپاره شول چې پاکستان ته له افغانستان غنم قاچاق کېږي، خو دافغانستان د مالیې وزارت د افغانستان ټولو ګمرکونو ته امر وکړ چې له افغانستان بهر دې غنم نه پرېږي.