کابل (پژواک، ۱۲ چنګاښ ۱۴۰۱): په کابل کې یو شمېر ښځو د یوې خبري غونډې په ترڅ کې له حکومته غوښتنه وکړه چې له شپږم ټولګي پورته د نجونو ښوونځي دې پرانیزي.
د اړوندې موضوع په اړه نن په کابل کې لسګونو ښځو اعتراضيه غونډه جوړه کړې وه.
د غونډې یوې ګډونوالې عینو ازبیک وویل چې حکومت دې د نجونو ښوونځي پرانیزي او دوی دې له زدهکړو نه محروموي.
هغې زیاته کړه، ښځو ته د زدهکړې اجازې نه ورکولو سره به د ټولنې ډېره برخه نالوستې پاتې شي.
نوموړې وویل: «ځینې داسې مېرمنې شته چې په کور کې څوک سرپرست نه لري او خپلو اولادونو ته همدا ښځه یوه مړۍ ډوډۍ پیدا کوي او د داسې ښځو په کور کینول له دوی سره ظلم دی.»
د یادې غونډې يوې بلې ګډونوالې راضیه سحر هم وویل چې حکومت دې هر څه ژر له شپږم تولګي پورته د نجونو ښوونځي پرانيزي.
د سحر په اند تعلیم د ښځو یو اساسي حق دی او څوک ترې دا حق نشي اخیستلای.
هغې زیاته کړه چې د ښځو پر وړاندې د ښوونځیو دروازې تړلو سره به په راتلونکي کې ټولنه له ډېرو ستونزو سره مخ شي.
د یادې اعتراضیه غونډې ځینو نورو ګډونوالو هم ورته څرګندونې وکړې او له حکومته يې د نجونو ښوونځيو د پرانیستلو غوښتنه وکړه.
حکومتي چارواکو په دې وروستيو کې د نجونو ښوونځيو د پرانیستلو په اړه څه نه دي ويلي.
خو سږ کال د وري په دوېمه، د پوهنې وزارت په یوې خبرپاڼې کې ویلي و، د پوهنې وزارت تر اوسه له شپږم ټولګي پورته د نجونو ښوونځیو د تعلیمي لړۍ د پیل په اړه پرېکړه نه ده کړې او په دې اړه پر یوې طرحې کار روان دی چې پایلې به یې وروسته له هېوادوالو سره شریکې شي.
Views: 130
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن