فراه ښار (پژواک، ۲۴ چنګاښ ۱۴۰۱) : نامعلومو وسله والو کسانو د فراه ولایت د بالابلوک ولسوالۍ د پخواني حکومت د ولسوال ملا سید محمد یو زوی وژلی او بل یې ټپي کړی دی.
ځایي سرچینې وایي، دا پېښه نن غرمه مهال ددې ولایت د هوایي ډګر لمر خاته لوري ته رامنځته شوې ده.
د ویشتل سویو کسانو د کاکا زوی عزت الله پژواک اژانس ته وویل، پېښه هغه مهال رامنځته شوې چې یاد کسان له کور څخه د بازار په لوري روان وو.
د هغه په وینا، د نامعلومو وسله والو په ډزو کې د پخواني ولسوال یو زوی وژل شوی او بل یې ټپي دی.
عزت الله وایي د ولسوال یاد زامن عبدالسلام او عبدالحنان نومیږي او د پخواني حکومت د پولیسو افسران وو.
فراه د اطلاعات او کلتور رییس مولوي عبدالحي سباوون هم پیښه تاییدوي خو نوموړی وایې چې د دغې پیښي په تړاو یو مشکوک کس نیول شوی.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن