د ازادو سیالیو افغان اتل خپل روسي سیال ته ماتې ورکړه

اټلانټا (پژواک، ۲۴ چنګاښ ۱۴۰۱): د سوک‌وهنې د ازادو سیالیو افغان اتل احمدولي هوتک خپل روسي سیال ته ماتې ورکړه.

د «ای ایم سي فایټ نایټ» سازمان دا سیالي د افغانستان پر وخت تېر ماسخوتن د روسیې په کراسنودار ښار کې ترسره شوه.

احمدولي هوتک تر لوبې مخکې پخپل فیسبوک‌پاڼه کې لیکلي و چې بشپړ چمتووالی یې نیولی او په بې صبرۍ ورته انتظار کوي.

دا په افغانستان کې تر سیاسي بدلون وروسته د احمد‌ولي هوتک لومړنۍ نړۍواله سیالي وه چې په بریالیتوب سره پای ته ورسېده.

هوتک تر لوبې وروسته ویلي: «ما بشپړ تمرینات کړي وو او دا مې هیله وه چې ګران هېواد ته دا ویاړ راوړم.»

احمد‌ولي هوتک د ازادو مبارزو مشهور افغان لوبغاړی دی چې له دې مخکې يې هم په بېلابېلو نړۍوالو سیالیو کې یې بریا خپله کړې ده.