ترینکوټ (پژواک، ۲۸ چنګاښ ۱۴۰۱): د اروزګان په مرکز ترینکوټ کې د وسلو یوه زېرمه له هغه وروسته وموندل شوه چې خاوند او مېرمنې خپلمنځي شخړه کړې وه او وروسته مېرمنې امنیتي کسانو ته د دې زېرمې په اړه معلومات ورکړي وو.
د دې مېرمنې خاوند د وسلو له زېرمې سره په تړاو نیول شوی دی.
د اروزګان د امنیې قوماندانۍ د لومړۍ امنیتي حوزې مسوول طالب اغا پژواک خبري اژانس ته وویل چې د مرکز ترینکوټ اړوند د خیرو کارېز سیمې په یوه کور کې یې د وسلو زېرمه موندلې ده.
هغه زیاته کړه، دغه زېرمه تېره ورځ له هغه وروسته وموندل شوه چې خاوند او مېرمنې خپلمنځي شخړه کړې وه او په پایله کې مېرمنې د خپل خاوند د وسلو د دې زېرمې په اړه امنیتي کسانو ته معلومات ورکړل.
هغه زیاته کړه، په ترلاسه شوو وسلو او مهماتو کې یوه پیکا، دوه کلاشینکوفونه، یو د هاوان نارنجک، یوه تومانچه، ۵ د راکټ مرمۍ، ۱۰ لاسي بمونه، ۷ نظامي چانټې او د بېلابېلو وسلو زرګونه مرمۍ شاملې دي.
د پولیسو د حوزې امر وايي، د ښځې خاوند له دې زېرمې سره په تړاو نیول شوی او پلټنې ترې پیل شوې دي.
د وسلو له زېرمې سره په تړاو نیول شوي کس دورمحمد پژواک خبري اژانس ته وویل چې د کورني تاوتریخوالي په پایله کې د هغه مېرمنې پولیسو ته دا مهمات ور ښودلي دي.
هغه زیاته کړه، په نیول شوو توکو کې یوازې دوه میله وسلې د ده دي او پاتې نورې د بل چا دي چې له خپلې مېرمنې یې په پټه د هغه لپاره ساتلې.
تېره ورځ هم په اروزګان کې د راکټ د سلګونو مرمیو یوه زېرمه موندل شوې وه.
Views: 2269
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن