افغان مینه‌وال: د کرکټ نړۍواله شورا دې پر اصف‌علي بندیز ولګوي

اټلانټا (پژواک، ۱۶ وږی ۱۴۰۱): د کرکټ اسیا جام سیالیو دویم پړاو لوبې پر مهال پاکستاني لوبغاړي پر افغان لوبغاړي د بېټ په وسیله د ګوزار هڅې د مینه‌والو غوسه راپارولې ده.

پرون د اسیا جام سیالیو دویم پړاو کې افغانستان او پاکستان لوبه درلوده، له لوبې مخکې، پر مهال یې او له لوبې ورسته د افغان او پاکستاني لوبغاړو او د دې دواړو لوبډلو مینه والو ترمنځ په ټولنیزو شبکو کې سختې ناندرۍ روانې دي.

د لوبې په نولسم اوور کې پاکستاني لوبغاړي اصف علي پر افغان توپ اچوونکي فرید ملک شپږیزه ووهله، خو په ور پسې بال وسوځېد.

د اصف علي له سوځولو وروسته فرید ملک له معمول سره سم د خوښۍ څرګندونه وکړه، خو اصف علي ورپسې وګرځېد او بېټ یې ورپسې پورته کړ خو نورو افغان لوبغاړو یې مخه ونیوه.

له یادې پېښې وروسته په ټولنیزو شبکو کې د افغانستان او پاکستان لوبډلو مینه‌وال د یو بل پر ضد پوسټونه ولگول او دا لړۍ لا هم روانه ده.

د کرکټ افغان مینه‌وال په ټولنیزو شبکو کې د اصف علي پر ضد پراخ کمپاین پیل کړی او د کرکټ له نړۍوالې شورا غواړي چې پر هغه دې بندیز ولګول شي.

https://twitter.com/amarkhil2/status/1567609356996288518?s=20&t=XMlp_d3tHcWOtN04F530Zw

د صدیق امرخېل په نوم یو افغان په ټویټر کې لیکلي، پر اصف علي باید بندیز ولګول شي، هغه له فرید ملک سره د یوه ترهګر په توګه چلند کړی دی.

د بادام احمدزي په نوم بل افغان په ټویټر کې لیکلی، اصف علي د کرکټ ښکلې لوبې سپکاوی کړی، باید بندیز پرې ولګول شي.

هغه د اصف علي یو پخوانی عکس هم خپور کړی چې له افغانستان سره د لوبې پر مهال یې خپل بېټ سره د ټوپک په څېر افغان لوبغاړي ته نیولی و.

د بشیر غروال په نوم د کرکټ بل افغان مینه‌وال په یوه ټویټ کې لیکلي، د اصف علي چلند د کرکټ له جذبې خلاف عمل دی، دا لومړی ځل نه دی چې هغه دا ډول چلند کوي، یوه ماشومانه عمل یې کړی دی.

Talk about spirit of the game!This is not the first time @AasifAli45 is being childish on world stage, salute @fareedmalik56 for his patience& professionalism here. @ICC @ACCMedia1 is this the msg u want to take across to the young cricketers watching this. #AsiaCup2022 #PakvsAfg pic.twitter.com/SJPOlfosLv

— Bashir Gharwal غروال (@bashir_gharwall) September 7, 2022

افغان ژورنالېست خالد امیري هم د کرکټ له نړۍوالې شورا غوښتي چې پر اصف علي بندېز ولګوي او ویلي یې دي چې هغه پخوا هم دا ډول کړي دي.

د هغه په وینا، اصف علي له شرمه ډک او غیر اخلاقي عمل ترسره کړی دی.

ګلستان شینواري بیا په فېسبوک کې لیکلي، اصف علي پر فرید ملک د فزیکي برید له کبله لږ تر لږه د یوې راتلونکې لوبې له بندیز سره مخامخېدلی شي.

هغه زیاته کړې، د نړۍوالو لوبو موخه له ولسونو سره نږدې کول وي او دا ډول کړنې یې تر منځ کرکه خپروي چې د منلو نه دي.

افغان ژورنالېست مطیع الله عابد لیکلي، کرکټ د اشرافو لوبه ده، د کرکټ نړۍواله او اسیايي شورا باید د هر قسم بد او ناسم چلند مخه ونیسي.

د پاکستان مشهور ژورنالېست حامد میر بیا د خپل لوبغاړي ننګه کړې او د فرید ملک پر ضد یې پوسټونه کړي او ادعا یې کړې چې د فرید ملک کبر لوبه کې د افغان لوبډلې د ماتې لامل شو.

Dear Mir, what happens in the field, stays at the field. Taunting a “national player” doesn’t look good.Let the umpires/referees decide who to blame. We don’t exactly know what happened, we were not there.After each match shaking opponents hands teaches us to respect each other. https://t.co/wdIdXec1h1

— Jafar Haand (@jafarhaand) September 7, 2022

خو افغان ژورنالېست جعفر هاند حامد میر ته په ځواب کې لیکلي: “په میدان کې چې څه پېښېږي، همالته یې لوبڅاران په اړه قضاوت او پرېکړه کوي، د یو بل هېواد ملي لوبغاړي ته دا ډول کلمات کارول له تا سره نه ښایي، له هر لوبې وروسته لوبغاړي یو بل ته سره لاس ورکوي چې دا په خپله موږ ته د درناوي درس راکوي.”

د کوزې پښتونخوا وتلي سیاستمدار محسن داوړ په ټویټر کې لیکلي، د کرکټ له لوبې په استفادې او پلمې له افغانانو سره تبعیض او توکمپالنه د بې شرمۍ وروستی حد دی.

Using a cricket match as an excuse to hurl racist abuse against Afghans is peak shamelessness. Pakistan's decades old strategic depth policy and interventionist misadventures in Afghanistan is why Afghans have a problem with Pakistan. Introspect before belittling Afghans.

— Mohsin Dawar (@mjdawar) September 7, 2022

هغه زیاته کړې: “له پاکستان سره د افغانانو مشکل د دغه هېواد له لوري په افغانستان کې د لسیزو اوږدې پالیسۍ پر مټ ناوړه لاس وهنه ده او مخکې له دې چې افغانانو ته سپکاوی وکړئ، لومړی خپل ځانونه وڅېړئ.”