نبي: اسیا جام سیالیو کې د لوبو پایلې مو له هیلو سره سمې نه وې

اټلانټا (پژواک، ۱۸ وږی ۱۴۰۱): د افغانستان کرکټ ملي لوبډلې لوبډلمشر محمدنبي وایي چې په اسیا جام سیالیو کې د لوبو پایلې یې له هیلو سره سمې نه وې.

که څه هم د افغانستان کرکټ ملي لوبډله د شل اووریز اسیا جام سیالیو ګروپي پړاو کې ښه وځلېده؛ بنګله‌دېش او سري‌لانکا په څير پیاوړو لوبډلو ته یې ماتې ورکړه، خو په دویم پړاو کې یې خپلې درې واړه لوبې وبایللې.

ملي لوبډلې په دویم پړاو کې له پاکستان او سري‌لانکا سره سخته مقابله وکړه، خو د هند پر وړاندې یې په اسانه لوبه وبایلله.

ملي لوبډلمشر محمدنبي د وږي په ۱۸مه په خپله ټویټرپاڼه کې لیکلي: «په اسیا کپ کې زموږ سفر پای ته ورسېد او د یوه لوبډلمشر په توګه دا درک کوم چې پایلې مو له توقع سره سمې نه وې.»

Our Asia Cup journey ended & I understand v did not deliver 2 d expectations.V wl build on this to come back stronger as a team & individuals 4 the upcoming WC. I truly appreciate our fans’ unconditional support & love. we r trying all at our disposal to bring smiles on ur faces. pic.twitter.com/bA234QYWUX

— Mohammad Nabi (@MohammadNabi007) September 9, 2022

هغه ژمنه کړې چې د شل اوریز نړۍوال جام ته به پیاوړي او غښتلي راستنېږي او د هېوادوالو پر مخونو به مسکاوې راولي.

محمد نبي د هېوادوالو له ملاتړه مننه کړې ده.