کندهار کې چاودنې د یوې کورنۍ درې کسان وژلي

کندهار (پژواک، ۲۸ وږی ۱۴۰۱): د کندهار په ژېړۍ ولسوالۍ کې د چاودنې له امله د یوې کورنۍ درې کسان وژل شوي او دوه نور ټپیان دي.

پېښه نن غرمه شاوخوا دوولس بجې د یادې ولسوالۍ په سنځري سیمه کې شوې ده.

د ژېړۍ ولسوالۍ امنیه قوماندان ملا عطاءمحمد پژواک خبري اژانس ته وویل، چاودنه د دې ولسوالۍ په سنځري سیمه کې د پخواني حکومت د ژېړۍ ولسوالۍ د لواء د قوماندان «محمود» په کور کې شوې ده.

هغه زیاته کړه، د محمود زامنو غوښتل خپل کور له سره ورغوي چې له پخوا پاتې چاودېدونکو توکو چاودنه ورباندې کړې چې له امله یې د هغه دوه زامن او یوه لور وژل شوي او مېرمن او ورور یې ټپيان شوي دي.

ټپيان د کندهار ښار میرویس روغتون ته وړل شوي چې تر دې دمه یې د روغتیايي وضعیت په اړه معلومات نشته.

Views: 247