ایمرجنسي روغتون: د کابل له چاودنې ۱۴ ټپیان ور وړل شوي چې ۴ یې ساه ورکړې ده

 لومړی تعقیب – کابل (پژواک، ۱ تله ۱۴۰۱): د کابل امنیه قوماندانۍ وایي، د کابل ښار لسمې امنیتي حوزې اړوند وزیر محمد اکبرخان جومات ته څېرمه چاودنه شوې ده.

د کابل امنیه قوماندانۍ ویاند خالد ځدراڼ پژواک خبري اژانس ته وویل، چاودنه د وزیر محمد اکبر خان جومات ته څېرمه پر غځېدلي سړک هغه مهال شوې چې خلک د جمعې له لمانځه د راوتلو په حال کې وو.

ده د جزییاتو له ورکولو پرته وویل: «د پېښې قربانیان ټول ملکي خلک او لمونځ کوونکي دي.»

دی وایي چې په دې اړه به نور جزییات وروسته خپاره شي.

خو په کابل کې د ایمرجنسي روغتون مسوولین وايي، په دې پېښه کې ۴ کسان مړه او ۱۰ نور ټپيان شوي دي.

دغه روغتون پر خپلې ټویټرپاڼې لیکلي چې د پېښې له ځایه ۱۴ ټپیان ور وړل شوي چې ۴ یې روغتون ته پر لار ساه ورکړې ده.

تر اوسه د دغې چاودنې مسوولیت کومې ډلې پر غاړه نه دی اخیستی.