کابل (پژواک، ۲۹ لړم ۱۴۰۱): د سره صلیب نړۍوالې کمېټې عملیاتي مشر مارټین شویپ له افغان چارواکو سره د خبرو په موخه کابل ته راغلی دی.
ده تېره ورځ ناوخته په خپله ټوېټرپاڼه کې لیکلي چې په افغانستان کې دی او د تېرو څو لسیزو جګړو او اقتصادي ستونزو له امله د خلکو ژوند خورا اغېزمن شوی دی.
هغه وايي: «خلک نور ستړي دي او د خوړو له کموالي، ډول ډول ناروغیو او بېوزلۍ سره مخ دي.»
د سره صلیب نړۍوالې کمېټې عملیاتي مشر مارټین شویپ له خپلو پورتنیو څرګندونو سره د یادې ادارې یوه لنډه وېډيو هم خپرې کړې چې په کې د افغانستان اوسنی وضیعت تشریح شوی دی.
د یادې ادارې د معلوماتو له مخې، اوس په افغانستان کې ۲۴،۲ میلیونه وګړي بشري مرستو ته اړتیا لري، ۹،۲ میلیون کسان د لسیزو جګړو له امله په کور دننه بېځایه شوي، نږدې ۲۰ میلیونه کسان د خوړو له کمښت سره مخ دي او زرګونو کسانو دندې له لاسه ورکړې دي.
Views: 71
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن