Pajhwok Afghan News

مزارشریف ښار کې غلو یوه پېغله وژلې ده

مزارشریف (پژواک، ۷ لېندۍ ۱۴۰۱): د بلخ امنیتي مسوولین وایي چې د دغه ولایت په مرکز مزارشریف ښار کې وسله‌والو غلو د حبیبې رحیمي په نوم یوه نجلۍ وژلې ده.

د بلخ امنیې قوماندانۍ ویاند محمداصف وزیري پژواک خبري اژانس ته وویل چې یاده پېښه نن سهار شاوخوا لس بجې د مزارشریف ښار اړوند زراعت سیمه کې شوې ده.

هغه زیاته کړه، د حبیبې رحیمي په نوم یوه پېغله له کوره د خیاطۍ دوکان ته پر لاره وه چې له غلو سره مخ شوې، غلو غوښتل مبایل یې وتښتوي، شخړه یې ورسره کړې چې له امله یې وژلې ده.

وزیري زیاتوي چې قضیه د امنیتي ځواکونو تر څېړنې لاندې ده او هڅه روانه ده قاتلین ژر ونیسي او د قانون منګولو ته یې وسپاري.

Views: 757

Exit mobile version