کورنیو چارو وزارت: د یوه بې‌پیلوټه الوتکې د قاچاق مخه نیول شوې

اټلانټا (پژواک، ۱۱ لېندۍ ۱۴۰۱): د کورنیو چارو وزارت وایي، له خوست ولایت څخه یوه ګاونډي هېواد ته د بې‌پیلوټه الوتکې د قاچاق مخه نیول شوې ده.

باختر خبري اژانس د کورنیو چارو وزارت د انتک ریاست د نظارت څانګې یوه افسر قاري زیارت ګل په حواله خبر ورکړی چې منسوبینو یې د خوست ښار اړوند په کنډیو سیمه کې عملیات کړي او درې کسان یې له یوه بې‌پیلوټه الوتکې سره نیولي دي.

سرچینې زیاته کړې چې یاد کسان له تېرې یوې میاشتې راهیسې تر څارنې لاندې وو او غوښتل یې دغه بې‌پيلوټه الوتکه یوه ګاونډي هېواد ته قاچاق او هلته یې په ۲۵۰ زره امریکایي ډالر خرڅ کړي.

قاري زیارت ګل وایي، په نیول شوو کسانو کې یو د یادې الوتکې خرڅوونکی او دوه قاچاقبران شامل دي او پر خپل جرم یې اعتراف کړی دی.

login or register a new account.