د ټولګټو وزارت: د کابل – جلال‌اباد پر لاره یوازې چاین‌ لرونکي موټر د تګ راتګ اجازه لري

جلال‌اباد (پژواک، ۱۰ سلواغه ۱۴۰۱): د ټولګټو وزارت د کابل – جلال‌اباد پر لويه‌لار د ترافيکي پېښو مخنيوي په موخه موټرچلوونکو ته امر کړی چې په ټايرونو کې له زنځير (چاينونو) څخه ګټه واخلي.

د معلوماتو له مخې، يوازې پرون پر یاده لویه‌لار له لسو ډېرې ترافيکي پېښې شوې چې په يوه کې يې يو کس مړ او ۱۴ نور ټپيان شوي دي.

د ټولګټو وزارت له خوا په خپره شوې اعلاميه کې راغلي، دغه پرېکړه د هېوادوالو د ژوند خونديتوب په موخه شوې ده.

په اعلاميه کې زياته شوې: «ټولګټو وزارت، د تګ راتګ پر مهال د هېوادوالو د خونديتوب او له زړه بوږنونکو پېښو څخه د مخنيوي په موخه د کابل – جلال‌اباد پر لويه‌لار یوازې هغو موټرو ته د تګ راتګ اجازه نه ورکوي چې زنځير يا چاین ونه لري.»

login or register a new account.