متقي: دیني عالمان دې د نظام د پایښت او پياوړتیا لپاره کار وکړي

کلات (پژواک، ۸ کب ۱۴۰۱): د بهرنیو چارو وزارت سرپرست مولوي امیرخان متقي وايي، دیني عالمان باید د نظام د پایښت او پياوړتیا لپاره کار وکړي او پرې نه ږدي چې اوسنی نظام ناکام شي.

نوموړي دا څرګندونې زابل ته په خپل سفر کې د کلات ښاروالۍ د غونډو په تالار کې «د اسلامي امارت نظام د بقا او ملاتړ مشورتي غونډه» کې وکړې چې د دغه ولایت چارواکو او لسګونو دیني عالمانو ګډون په کې کړی و.

متقي وویل، دیني عالمان درانه مسوولیتونه لري او تر بل هر چا ډېر باید خپلو مسوولیتونو ته متوجه و اوسي.

هغه زیاته کړه: «دیني عالمانو ته په کار ده چې د نظام د پایښت او پیاوړتیا لپاره کار وکړي او پرې نه ږدي چې اوسنی نظام ناکام شي.»

د ده په خبره، بهرنیانو د نظام ناکامولو ډېرې هڅې وکړې خو بریالي نه شول.

هغه وویل: «بهرنیانو کوښښ وکړ چې د نظام ناکامولو په موخه خلک له هېواده وباسي، د نفاق اور بل کړي، اقتصادي بندیزونه ولګوي خو بریالي نه شول، زموږ د ښه تدبیر له امله اوس نظام ورځ تر بلې پیاوړی کېږي، شاوخوا ۸۰۰ زره مامورینو او پوځ ته معاش ورکول کېږي، ۱۵۵ زره معلولینو، ۳۵۰ زره یتیمانو او ۷۰ زره کونډو ته میاشتني حقوق ورکول کېږي، هر ځای د بیارغونې کارونه روان دي چې ښه مثال یې د قوش تېپې کانال دی.»

هغه د خپلې لنډې وینا په لړ کې زابل د علم ټاټوبی یاد کړ او له مسوولینو یې وغوښتل څو د دغه ولایت اوسېدونکي ته کار وکړي او د هغوی زړونه خپل کړي.

غونډې ته د زابل والي مولوي قدرت‌الله ابو حمزه هم وویل چې علماء باید د نظام مسوولینو ته سالمې مشورې ورکړي، څو نظام پایښت ومومي.

هغه زیاته کړه، دغه راز علماء کولای شي د خلکو ستونزې او غوښتنې هم تر دوی ورسوي څو د حل لپاره یې اقدام وشي.

د غونډې ګډونوالو دیني عالمانو د اوسني نظام په ملاتړ خبرې وکړې خو له مسوولینو یې وغوښتل چې له هېواده تللي پخلا او بېرته را ستانه کړي.

یوه دیني عالم مولوي خیرالباري فاروقي وویل، اوس چې سراسري امنیت ټینګ شوی، باید د هېواد د پرمختګ او بیارغونې لپاره کار وشي.

هغه زیاته کړه: «اسلامي امارت دې له هېواد څخه تللي خلک بېرته هېواد ته راستانه کړي او پرې نه ږدي چې د هغوی له اولادونو پردي استفاده وکړي.»

بل دیني عالم مولوي عزیزالله وویل، حکومت دې د نظام پیاوړتیا لپاره تل دغسې مشورتي ناستې جوړې کړي.

هغه دغه راز یادونه وکړه چې د دغه ولایت د اوسېدونکو ستونزو ته دې هم پام وشي او حل لارې دې ورته وموندل شي.