کابل ښار کې چاودنې دوه کسان ټپیان کړل

کابل (پژواک، ۱۹ کب ۱۴۰۱): د کابل ښار د پنځمې حوزې اړونده سیمه کې یوې چاودنې له امله دوه کسان ټپیان شوي دي.

د کابل امنیه قوماندانۍ ویاند خالد ځدراڼ د کب په ۱۹مه ویلي چې دا چاودنه له ماښام وروسته د کابل ښار د پنځمې حوزې اړونده سیمه سپین کلي څلورلارې سره نږدې شوې ده.

هغه د چاودنې څرنګوالي په اړه نور جزیات نه دي ورکړي، خو زیاته کړې چې دوه کسان ټپیان شوي دي.

ځدراڼ ویلي، د پېښې په اړه پلټنې پیل شوې دي.

بلخوا د سیمې اوسېدونکو په ټولنیزو شبکو کې لیکلي چې د درنې چاودنې او ډزو غږونه یې اورېدلي دي.

د یادونې ده، پرون هم د کابل ښار پنځمې حوزې اړوند د ښوونې او روزنې پوهنتون پر سړک چاودنه شوې وه چې د مسوولینو په وینا، مرګ‌ژوبله یې نه لرله.

Views: 75