کابل (پژواک، ۲۱ غویی ۱۴۰۲): د افغانستان او ترکمنستان چارواکو هوکړه کړې چې ډېر ژر به د ټاپ پروژې پلې کولو په موخه د پاکستان په ګډون درېاړخیزه ناسته ترسره شي.
ټاپ له ترکمنستانه د افغانستان له خاورې پاکستان ته د برښنا لېږدونې پروژه ده.
د اوبو او انرژۍ وزارت په خبرپاڼه کې راغلي چې د دغه وزارت، د افغانستان برېښنا شرکت او د ترکمنستان سفارت استازو ترمنځ ګډه ناسته ترسره شوه او پکې د ټاپ پروژې او نورالجهاد سبسټیشن جوړولو همکاریو په تړاو خبرې وشوې.
په خبرپاڼه کې راغلي، د اوبو او انرژۍ وزارت او د ترکمنستان هېواد سفیر د دې ناستې په ترڅ کې هوکړه وکړه چې ډېر ژر به د ترکمنستان، افغانستان او پاکستان د وزیرانو په کچه درېاړخیزه ناسته وشي، څو د ټاپ پروژې پلې کولو په موخه هراړخیز بحث وشي.
د یاد وزارت د معلوماتو له مخې، په پای کې دواړو لورو د ګډو همکاریو پراختیا او د دواړو هېوادونو د تخنیکي ټیمونو ترمنځ د یادو پروژو د چارو چټکتیا لپاره د همغږیو پر رامنځته کولو ټینګار وکړ.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن