پاکستان له افغانستان، ایران او روسیې سره جنس په جنس سوداګري پیلوي

اټلانټا (پژواک، ۱۲ غبرګولی ۱۴۰۲): د پاکستان د سوداګرۍ وزارت اعلان کړی چې پاکستان له افغانستان، ایران او روسیې سره جنس په جنس سوداګري پیلوي.

دا په داسې حال کې ده چې پاکستان له سخت اقتصادي بحران سره مخ دی او نه شي کولی په نغدو پیسو له نورو هېوادونو سره سوداګریزه راکړه ورکړه وکړي.

د ډیوه راډیو خبر له مخې، د پاکستان حکومت د یوه مکتوب له لارې د سوداګرۍ وزارت ته ویلي چې غواړي له افغانستان، روسیې او ایران سره د توکو په بدل کې د توکو سوداګري پیل کړي.

سرچینې زیاته کړې، د توکو په بدل کې د توکو  پاليسي د جون له لومړۍ نېټې اعلان شوې او د روان کال لپاره د سوداګریزو توکو یو فهرست هم جوړ کړل شوی دی.

په مکتوب کې راغلي، که چېرې دولتي ادارې او یا خصوصي سکټور له دغو هېوادونو سره په دې ډول سوداګري غواړي، نو باید له حکومت څخه اجازه واخلي.

بلخوا د پاکستان حکومت افغانستان ته د اوړو، غنمو، بورې او سرې پر قاچاق بندیز لګولی دی.