کابل کې د سوک‌وهنې سیالۍ پیل شوې

کابل (پژواک، ۱۳ غبرګولی ۱۴۰۲): د ورزش او المپیک ملي کمېټه وایي، په کابل کې د ۲۴ کلبونو ترمنځ د سوک‌وهنې سیالۍ پیل شوې.

یادې کمېټې نن په خپله ټویټرپاڼه کې لیکلي چې په پلازمېنه کابل کې د بدني روزنې او ورزش عمومي ریاست د سوک‌وهنې ملي فدراسیون په تمريناتي ځاى کې د کابل ښار د ٢٤ کلبونو د ۱۱۵ ورزشکارانو ترمنځ د سوک‌وهنې سیالۍ پیل شوې.

المپیک ملي کمېټې ویلي، په دغو سیالیو کې ۱۲، ۱۳ او ۱۴ کلن ورزشکاران ګډون لري چې درې ورځې به دوام وکړي.

سرچینه وایي چې دغه سیالۍ د کم عمرلرونکو ورزشکارانو د هڅونې او تشویق لپاره ترسره کېږي.