بهرنیو چارو وزارت: د شانګهای راتلونکې سرمشریزه کې دې افغان حکومت ته هم بلنه ورکړل شي

کابل (پژواک، ۱۴ چنګاښ ۱۴۰۲): د بهرنیو چارو وزارت وایي، اسلامي امارت د سیمې امنيت خونديتوب او د همکاریو پراخوالي په تړاو د هرې غونډې هرکلى کوي او په ورته ناستو کې د افغانستان استازي ته د ګډون زمینې مساعدېدل خپل مسلم حق بولي.

دا په داسې حال کې ده چې تېره ورځ د هند په کوربه‌توب د شانګهای همکاریو سازمان ۲۳مه سرمشریزه غونډه په انلاین بڼه ترسره شوه او په دې غونډې کې په افغانستان کې پر ټولګډون حکومت او له افغانانو سره پر بشري مرستو ټینګار وشو.

د یادې ناستې په تړاو بهرنیو چارو وزارت په یوه خبرپاڼه کې ویلي، د افغانستان اسلامي امارت د سیمې امنيت خونديتوب او د همکاریو پراخوالي په اړه د ښې همغږۍ رامنځته کولو په پار د ورته ناستو هرکلی کوي.

په اعلامیه کې راغلي: «په ورته ناستو کې چې افغانستان یې د ناظر په توګه غړیتوب لري، زموږ استازي ته د ګډون زمينې مساعدېدل خپل مسلم حق او نه شتون یې د هر اړخيزې همغږۍ پر وړاندې خنډ بولو.»

login or register a new account.