د اروزګان والي: موسسې دې فاسد او د تېر حکومت امنیتي کسان پر دندو نه ګوماري

ترینکوټ (پژواک، ۲۴ چنګاښ ۱۴۰۲): د اروزګان والي وايي، یوازې د هغو پروژو تطبیق ته به په دغه ولایت کې اجازه ورکړي چې د خلکو او هېواد په ګټه وي.

د اروزګان والي مولوي محمدعلي جان احمد دغه څرګندونې نن د دغه ولایت په مرکز ترینکوټ کې د ځینو موسسو له استازو سره په غونډه کې کړې او له هغوی یې غوښي چې په خپلو ادارو کې دې مفسدو او د تېر نظام امنیتي کسانو ته دندې نه ورکوي.

والي زیاته کړې: «د معلومات له مخې، په اروزګان کې یو شمېر موسساتو هغو کسانو ته دندې ورکړې چې د ولایتي ادارې د تصفيې کمېسیون له خوا د فساد له امله له دندو ګوښه شوي وو، همدارنګه هغو نظامیانو ته یې هم دندې ورکړې چې کلونه له اسلامي امارت سره په جګړه اخته وو.»

هغه وویل: «که د دې لړۍ مخنیوی ونه شي، نو ولایتي اداره به مجبوره شي چې د دغو کسانو پر وړاندې جدي اقدام ترسره کړي او له سرغړوونکو سره به قانوني چلند وشي.»

login or register a new account.