هرات (پژواک، ۲۵ چنګاښ ۱۴۰۲ ): هرات کې مچۍلرونکي او د شاتو تولیدوونکي د دغه ولایت په بازارونو کې د بېکیفیته وارداتي شاتو د شتون او د خپلو محصولاتو بازار پیکهوالي په اړه اندېښمن دي.
د هرات د کرنې، اوبو لګولو او مالدارۍ ریاست د دغه ولایت په بازارونو کې د ناخالص او ټيټکیفیت شاتو شتون تاییدوي خو ټینګار کوي چې هېواد ته د وارداتي او بېکیفیته عسلو مخنيوي برخه کې کوټلي او عملي ګامونه اخیستل شوي دي.
په هرات کې د شاتو یوې تولیدوونکې مسلمې حاجيزاده پژواک ته وویل چې د خپل کور په زرغونه فضا کې په طبیعي ډول د شاتو په چمتو کولو بوخته ده.
هغه زیاتوي، خپل کاروبار مې د شاتو له درې صندوقه مچیو پیل کړی او اوس یې مچۍ ۳۰ صندوقونو ته رسېدلې دي.
د نوموړې په خبره، ۳۰۰ صندوقه مچۍ ساتلی شي، خو تر اوسه یې کوم بنسټ مالي ملاتړ نه دی کړی او د دغه ولایت د کرنې ریاست د اړتیا پر مهال یوازې مشوره ورکړې ده.
حاجيزاده د خپلو تولیداتو لپاره د مناسب بازار نشتوالي او په هرات کې د بېکیفیته شاتو شتون په اړه اندېښنه څرګندوي او وايي چې د ټيټکیفیته عسلو شتون په بازار کې د طبیعي شاتو بازار خرابوالي لامل ګرځي.
هغه د هرات کرنې له ریاسته غواړي چې د شاتو تولیدوونکو پر ملاتړ سربېره په هېواد کې د بېکیفیته او وارداتي شاتو مخنیوی وکړي.
هغې زیاته کړه: «له بده مرغه د وارداتي او بېکیفیته شاتو ستونزه له پخوا راهیسې موجوده ده، تر اوسه نه ده هواره شوې، دغه کار د طبیعي شاتو بیې ټیټېدو لامل شوی؛ د هرات طبیعي او وارداتي عسلو ترمنځ باید تفکیک وشي څو پېرېدونکی د طبیعي شاتو پر ځای بېکیفیته شات ونه پېري.»
یو شمېر شات پلورونکي هم په هرات کې د عسلو د پلور بازار له پيکهکېدو شکایت کوي او وايي چې مخکې د شاتو بازار ښه و او خلکو په ورځنیو خوړو کې هم شامل کړي وو، خو اوس هغسې نه ده.
یوه عسل پلورونکي عبدالرووف پژواک ته وویل، مخکې د خلکو اقتصادي وضعیت ښه و او هر چا به پېرل، خو اوس خلک لږ شات اخلي او د پلور بازار یې ډېر خراب دی.
هغه زیاته کړه، بېکیفیته شاتو د طبیعي شاتو د پلور بازار خراب کړی دی.
بلخوا، د هرات د کرنې ریاست د ترویج عمومي مدیر انجنیر خلیلاحمد بهمنش له پژواک سره خبرو کې وویل، مخکې به په زیاته اندازه بېکیفیته شات له ګاونډیو هېوادونو افغانستان ته واردېدل، خو واک ته د اسلامي امارت له رسېدو سره د بېکیفیته شاتو د وارداتو مخنیوي برخه کې جدي اقدامات شوي دي.
هغه زیاته کړه چې په دغه ولایت کې د شاتو کمښت له امله له بهرنیو هېوادونو د عسلو وارداتو ته زمینه برابره شوې او دغه کار د دې لامل شوی چې د ټیټ کیفیت شات هم بازار ته وړاندې شي.
دا په داسې حال کې ده چې دا مهال په هرات ولایت کې د مچیو ۳۵ زره صندوقونه شته چې په دې برخه کې ۷۰۰ کسانو ته د کار زمینه برابره شوې ده.
د یادونې ده، ډېر عسل د یاد ولایت په انجیل، پښتونزرغون، کرخ او ګذره ولسوالیو کې تولیدیږي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن