د خوست ځاځي‌میدان کې د ختم یوه پروګرام ۲۰۰ ګډونوال مسموم شوي

[restrict paid="true"]

خوست‌ښار (پژواک، ۱۵ زمری ۱۴۰۲): خوست کې ځایي مسوولين وايي چې د دغه ولایت په ځاځي میدان ولسوالۍ کې د خيرات يوه پروګرام شاوخوا ۲۰۰ ګډونوال مسموم شوي دي.

د خوست امنيې قوماندانۍ وياند مستغفر ګربز د زمري په ۱۵مه پژواک خبري اژانس ته د دغه خبر د تاييد ترڅنګ وويل چې دغه پېښه نن مازديګر د ځاځي ميدان ولسوالۍ د الګاډې سيمې د سټکيو په کلي کې شوې ده.

هغه زیاته کړه چې یاد کسان د خیرات ډوډۍ له خوړلو وروسته مسموم شوي دي.

د نوموړي په وينا، د لومړنيو معلوماتو له مخې، داسې ښکاري چې د خيرات ډوډۍ ته کوم چا زهر اچولي وي.

ګربز وایي، مسموم شوي کسان د خوست مرکز ترڅنګ د بېلابېلو ولسواليو کې روغتيايي کلينيکونو ته لېږدول شوي دی.

د امنیه قوماندان ویاند وویل چې د دغو کسانو روغتيايي حالت د ډاډ وړ ښودل شوی دی.

د طاهر عظيمي په نوم د سيمې يوه اوسېدونکي او عيني شاهد بيا پژواک اژانس ته  وویل چې په دې پېښه کې شاوخوا ۴۰۰ کسان مسموم شوي.

هغه د ځينو کسانو روغتيايي حالت يو څه د اندېښنې وړ وښود.

[/restrict]