اوچا: افغانستان کې په اوو میاشتو کې له ۲۲،۶ میلیون کسانو سره مرسته شوې ده

کابل (پژواک، ۲ تله ۱۴۰۲): په افغانستان کې د ملګرو ملتونو د بشري مرستو همغږی‌کوونکی دفتر (اوچا) وایي، د بشري مرستو فعالو سازمانونو د روان کال له جنورۍ تر جولای میاشتې پورې له ۲۲،۶ میلیون کسانو سره د خوراکي توکو او نورې مرستې کړې دي.

اوچا یوه راپور کې لیکلي، دا مرستې ۹،۷ میلیون کسانو ته د صحي مراقبتونو، ۳،۵ میلیون ماشومانو او امیدوارو ښځو ته د خوارځواکۍ، ۶،۸ میلیون کسانو ته د څښلو پاکو اوبو، د دوه میلیون ماشومانو زده‌کړو، ۴۱۳ زره کسانو لپاره د بېړنۍ سرپناه او د ۱،۸ میلیون کسانو خوندیتوب برخو کې شوې دي.

سرچینې زیاته کړې چې د دې مرستو ۸۵۰ میلیون بودجه د ۲۰۲۲ کاله ته لېږدول شوې وه چې د ۲۰۲۳ کال له پیسو سره پوره شوه.

دا په داسې حال کې ده چې تېره ورځ د خوړو نړۍوال سازمان وویل چې افغانستان له سوډان وروسته د نړۍ یو له هغو هېوادونو نه دی چې په کې له یوه میلیون ډېر خلک له سختې لوږې سره مخ دي.