میدانښار(پژواک، ۱۶ تله ۱۴۰۲): میدانوردګو کې مسوولین وايي، نن د ۴۰ میلیون او ۳۰۰ زره افغانیو په لګښت د وردګ پوهنتون د احاطې دېوال د جوړېدو چارې پيل شوې.
د لوړو زدهکړو سرپرست وزیر شیخ ندامحمد ندیم چې میدانوردګو ته یې سفر کړی له دغه پوهنتونه د لیدنې پرمهال یې وویل، راتلونکی کال به د وردګ پوهنتون د لیلیې ودانۍ هم جوړه شي.
هغه زیاته کړه چې د لوړو زدهکړو وزارت رهبري د تحصیلي نظام د پياوړتیا لپاره هڅې کوي.
د دغه پوهنتون رییس مولوي صفتالله حقاني هم وویل چې د دې پروژې لګښت ۴۰ میلیون او ۳۰۰ زره افغانۍ اټکل شوی چې د دولت له بودجې ورکول کېږي.
هغه زیاته کړه چې د یادې پروژې کارونه به د شپږو میاشتو په اوږدو کې بشپړ شي.
نوموړی وايي، دغه پوهنتون کې د ۱۷۷ کادري ښوونکو له خوا د کرنې، ښوونې او روزنې، اقتصاد او کمپیوټر ساینس پوهنځیو محصلینو ته زدهکړې ورکول کېږي.
هغه وویل چې د یاد پوهنتون لپاره د شرعیاتو پوهنځی هم منظور شوی چې په وینا يې راتلونکی کال به محصلین ومني.
بلخوا د دغه پوهنتون محصلین هم د دې پروژې پيلېدو ته خوښ دي او له حکومته غواړي چې په وردګ پوهنتون کې دې د یو شمېر ودانيو نیمګړې چارې هم بشپړې کړي.
د یاد پوهنتون د ښوونې او روزنې پوهنځي یوه محصل رفیعالله پژواک ته وویل، د دوی په پوهنتون کې د ځینو ودانیو چارې نیمګړې پاتې دي چې باید بشپړې شي.
Views: 63
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن