پرون له پاکستان او ایرانه څه باندې اته زره کډوال راستانه شوي

کابل (پژواک، ۲۲ لړم ۱۴۰۲): د کډوالو او راستنېدونکو چارو وزارت وایي چې پرون څه باندې ۵ زره کډوال له پاکستان او له درې زره ډېر له ایرانه راستانه شوي دي.

پاکستان له دې مخکې هغو افغان کډوالو ته چې د اوسېدنې قانوني اسناد نه لري، د روان کال د نومبر تر لومړۍ نېټې وخت  ورکړی و چې دغه هېواد پرېږدي، که نه په زور به وایستل شي.

د کډوالو او راستنېدونکو چارو وزارت نن پر خپله ایکس‌پاڼه لیکلي چې پرون ۵۰۵۷ کډوال چې ۶۰۸ کورنۍ کېږي، له پاکستانه راستانه شوي دي.

د سرچینې د معلوماتو له مخې، په دغو راستنېدونکو کې ۱۰ محبوسین هم شامل دي چې ټول له دغه هېواده په زور را ایستل شوي او د سپین‌بولدک او تورخم له لارو هېواد ته راغلي دي.

دغه راز د ننګرهار د تورخم سرحدي امریت معلوماتو له مخې، ۳۲۹ کورنۍ چې ۱۷۱۰ کسان دي، له پاکستانه په زور را ایستل شوي دي.

سرچینې لیکلي چې هرې کورنۍ ته د اسلامي امارت له لوري ۱۰ زره افغانۍ ورکړل شوې دي.

د یوه بل خبر له مخې، د کډوالو وزارت ویلي، د روان کال د لړم میاشتې په ۲۱مه له ایرانه ۳۰۴۷ افغان کډوال په زور او په داوطلبانه ډول هېواد ته راستانه شوي دي.

سرچینه زیاتوي، د دغو کډوالو له منځه ۳۱۹ یې زیانمن او اړمن پېژندل شوي او د مرستو ترلاسه کولو په موخه د کډوالۍ نړۍوال سازمان (ای‌او‌اېم) ته معرفي شوي او د خوراکي او غیرخوراکي توکو مرسته یې هم ترلاسه کړې ده.