له پاکستانه ۲۹۱ نور افغان کډوال کاناډا ته ولېږدول شول

کابل (پژواک، ۴ لیندی ۱۴۰۲): د کاناډا د کډوالو چارو اداره وایي چې دغه هېواد ته یې په یوه چارټر الوتنه کې له پاکستانه ۲۹۱ نور افغان کډوال لېږدولي دي.

د کاناډا د کډوالو چارو ادارې (IRCC) پر خپله اېکس‌پاڼه لیکلي چې یاد شمېر افغان کډوال وړمه ورځ د دغه هېواد هالیفیکس ښار ته رسېدلي دي.

سرچینې زیاته کړې چې دغه افغان کډوال یې له پاکستانه په یوه چارټر الوتنه کې کاناډا ته لېږدولي دي.

د سرچینې د معلوماتو له مخې، د ۲۰۲۱ کال له اګسټ میاشتې راهیسې کاناډا ته لږ تر لږه ۴۰ زره افغانان رسېدلي دي.