اټلانټا (پژواک،۱۶مه ۱۴۰۲): د بېل ګېټس بنسټ د نړۍوالې پرذختیا رییس کریس الیاس او د سویلي اسیا لپاره د یونیسف ادارې مشر د عامې روغتیا وزیر سره د پولیو پر له منځه وړلو خبرې وکړې.
ددغه وزارت لخوا د لېندۍ په ۱۶مه، په یوه خبرپاڼه کې ویلي، یادو کسانو سره په کتنه کې د عامې روغتیا وزارت سرپرست ډاکټر قلندر عباد د روغتیا په برخه کې د نړۍوالو ادارو له ملاتړه مننه وکړه .
هغه زیاته کړه:: «د پولیو د له منځه وړلو لپاره یوازې واکسین نه؛ بلکې دوامداره واکسینونه، لومړني روغتیايي خدمتونه، خوارځواکۍ اړوند خدمتونه، عامه پوهاوي او نورو اساسي برخو پیاوړتیا ته اړتیا شته.»
همدارنګه د یادې کتنې پر مهال د پولیو د له منځه وړلو ملي بېړني عملیاتي مرکز تخنیکي ټیم د پولیو پروګرام د پرمختګونو، لاسته راوړنو، شته غبرګونونو او راتلونکو پلانونو په اړه ځانګړی پرېزنټېشن وړاندې کړ.
په پای کې د عامې روغتیا وزارت او نړیوالو شریکانو په افغانستان کې د پولیو ناروغۍ بشپړ ختمولو په اړه خپلې ژمنې تازه کړې او ویې ویل، تر هغه به خپلې هڅې کوي چې دغه بدمرغه ناروغي په بشپړه توګه له منځه لاړه شي.
Views: 94