د ترانسپورټ وزارت سرپرست د یوه پلاوي په مشرۍ ازبکستان ته ولاړ

کابل (پژواک، ۵ مرغومی ۱۴۰۲): د ترانسپورټ او هوايي چلند وزارت سرپرست ملا حمیدالله اخندزاده په ترانسپورټي مسایلو د خبرو لپاره د یوه پلاوي په مشرۍ ازبکستان ته ولاړ.

د ترانسپورټ او هوایي چلند وزارت پرخپله اېکس‌پاڼه لیکلي چې د یاد وزارت سرپرست به د دغه سفر په ترڅ کې د ازبکستان د ترانسپورټ له وزیر سره د دواړو هېوادونو ترمنځ د ترانسپورټي چارو پر پراختيا خبرې وکړي او ترڅنګ به يې د هوايي چلند له مسوولینو سره هم لیدنه ولري.

سرچینې د جزییاتو له ورکولو پرته لیکلي چې څه موده مخکې د ازبکستان د ترانسپورټ وزير او د هغه هېواد ځیني اړوند چارواکي هم افغانستان ته راغلي وو او د ځمکني ترانسپورټ اړوند پر دوه اړخيزو همکاريو یې ګټورې خبرې وکړې.