بغلان کې د مرمۍ چاودنې دوه ماشومان وژلي او اته نور ټپيان دي

پلخمري (پژواک، ۲۷ مرغومی ۱۴۰۲): د بغلان ولایت په مرکزي بغلان ولسوالۍ کې د یوې مرمۍ چاودنې له امله دوه ماشومان وژل شوي او اته نور ټپیان دي.

د بغلان امنیې قوماندانۍ ویاند مولوي شېراحمد برهاني نن (د مرغومی ۲۷مه) پژواک خبري اژانس ته وویل، یاده پېښه پرون د مرکزي بغلان ولسوالۍ اړوند «کهنه قلعه» کلي کې شوې ده.

د ولسوالۍ د روغتون امر ډاکټر عبید وایي، د پېښې له ځایه د ماشومانو دوه مړي او اته ټپيان وروړل شوي دي.

د هغه په خبره، وژل شوي ماشومان نهه او لس کلن وو.

خو بلخوا بیا د امنیې قوماندانۍ مسؤولین وايي، په دې پېښه کې یو ماشوم وژل شوی او اته نور ټپيان دي.