کابل (پژواک، ۱۰ سلواغه ۱۴۰۲): په اروزګان، لوګر او پکتیا ولایتونو کې له څه باندې پنځو زرو کورنیو سره د خوراکي توکو او په کونړ کې له ۴۰۰ کورنیو سره د ژمني توکو او البسې مرسته شوه.
د اروزګان د کلیو پراختیا او بیارغونې ریاست اداري مدیر ننګیالي حبیبي پژواک خبري اژانس ته وویل چې نن د دغه ولایت په چنارتو ولسوالۍ کې له ۱۶۲۴ اړمنو کورنیو سره د خوراکي توکو مرسته وشوه.
د یوه بل خبر له مخې، د پکتیا د کلیو پراختیا او بیارغونې ریاست ویاند ایمیل عمر هم وایي چې نن د یاد ولایت په سیدکرم او احمدخېلو ولسوالیو کې له ۲۱۸۰ کورنیو سره د خوراکي توکو مرسته شوې ده.
د لوګر د کلیو بیارغونې او پراختیا ریاست مطبوعاتي مسوول صبغتالله نایبخېل وایي چې د دغه ولایت په څرخ او برهکيبرک ولسوالیو کې له ۱۳۵۰ کورنیو سره د خوراکي توکو مرستې وشوې.
د سرچینو د معلوماتو له مخې، یادې مرستې د ملګرو ملتونو د خوړو نړۍوال سازمان په مالي ملاتړ وېشل شوې او هرې کورنۍ ته ۵۰ کیلوګرامه اوړه، غوړي، چای، دال، مالګه او یوه اندازه د ماشومانو تقویتي خواړه ورکړل شول.
د یوه بل خبر له مخې، د کونړ ولایت د پېښو پر وړاندې د مبارزې او چمتووالي ریاست د زیانونو او ارزونې مدیر احسانالله وویل چې د دغه ولایت په مرکز اسعداباد او وټهپور ولسوالۍ کې د طبیعي پېښو له امله ۴۰۰ زیانمنو شوو کورنیو سره د ژمنیو توکو او البسې مرسته وشوه.
د هغه د معلوماتو له مخې، دغه مرستې د افغانستان لپاره د بشري مرستو صندوق «اېاېچاېف» په مالي ملاتړ وېشل شوې او هرې کورنۍ ته دوه ګازډبې، کمپلې، دوه ګازي بخارۍ او یوه اندازه کالي ورکړل شوي دي.
GET IN TOUCH
NEWSLETTER
SUGGEST A STORY
PAJHWOK MOBILE APP