پلعلم (پژواک، ۲۳ غبرګولي ۱۴۰۳): د لوګر بدني روزنې او سپورټ ادارې مسوولین وایي چې د دغه ولایت په کوربهتوب د اتو ولایتونو او پاکستاني ورزشکارانو ترمنځ د ازادې مبارزې سیالۍ ترسره شوې.
د لوګر د بدني روزنې او سپورټ ادارې امر انجنیر مزمل نعیمزي پژواک خبري اژانس ته وویل چې نن په دغه ولایت کې د لوګر، کابل، کونړ، میدانوردګو، غزني، پکتیا، پکتیکا او خوست ولایتونو او پاکستاني لوبغاړو ترمنځ د ازادې مبارزې (MMA) سیالۍ ترسره شوې.
هغه زیاته کړه چې په دغو سیالیو کې لسګونو ورزشکارانو برخه اخیستې وه چې د لوګر ورزشکارانو وکولای شول خپل پاکستاني سیالان مات کړي.
د هغه په وینا، د دغو سیالیو موخه رزمې ورزش(MMA) ته وده ورکول، د ورزشکارانو ترمنځ د تجربو شریکول او همغږي رامنځته کول دي.
دغه راز، د لوګر یوه ورزشکار روحالله پژواک ته وویل، دا لومړی ځل دی چې په لوګر کې د افغان او پاکستاني ورزشکارنو ترمنځ دغه ډول سیالۍ ترسره کېږي.
هغه زیاته کړه، دوی وکولای شول خپلو پاکستاني سیالانو ته ماتې ورکړي او اتلولي ترلاسه کړي.
د یادونې ده، څه موده مخکې په پکتیا کې هم د افغان او پاکستاني ورزشکارانو ترمنځ د ازادې مبارزې سیالۍ ترسره شوې وې چې افغان لوبغاړو خپل پاکستاني سیالان مات کړي وو.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن