د پروان امنیه قومانداني: هغه ډله غله ونیول شول چې له یوه ټکسي‌چلوونکي یې موټر بیولی و

چاریکار (پژواک، ۶ سرطان ۱۴۰۳): د پروان امنیه قومانداني وایي، هغه ډله غله یې نیولي چې د دغه ولایت په سالنګ ولسوالۍ کې یې یو ټکسي موټر غلا او د هغه چلوونکی یې ټپي کړی و.

د پروان امنیې قوماندانۍ ویاند فضل‌الرحیم مسکین‌یار وایي، پرون بېګا لس‌نیمې بجې د سالنګ پر لویه لار یوې ډلې غلو چې دوه نارینه، یوه مېرمن او دوه ماشومان په کې شامل دي، یو ټکسي‌وان د تومانچې په ډزو ټپي کړی او موټر یې ترې بیولی و.

هغه زیاته کړې، غلو غوښتل یاد موټر د پروان له لارې کابل او بیا جنوبي ولایتونو ته بوځي خو له پېښې نیم ساعت وروسته یاد کسان ونیول شول.

د نوموړي په خبره چې د نیول شوو کسانو دوسیې به له لومړنیو څېړنو وروسته اړوندو ارګانونو ته وسپارل شي.