مهترلام (پژواک، ۱۰ چنګاښ ۱۴۰۳): د لغمان د الینګار ولسوالۍ اړوند د ساو درې یو شمېر اوسېدونکي شکایت کوي چې په سیمه کې یې روغتیایي خدمتونو ته د نه لاسرسي له امله له ستونزو سره مخ دي.
د لغمان د الینګار ولسوالۍ د ساو درې د فوجي کلا یوه قومي مشر ملک پرواز پژواک خبري اژانس ته وویل، په ساو دره کې د کنډهکوړک، سالاوا، فوجي کلا، دیالم، سوتن، کندلم، منډهپال، کوټا کونګل، سایمن او شکمش په نوم لس کلي دي چې شاوخوا لس زره کورنۍ پهکې ژوند کوي.
د هغه په خبره چې د یادو کلیو خلک له کلونو راهیسې هیڅ ډول روغتیایي خدماتو ته لاسرسی نهلري.
نوموړي وویل: «د تېر ۱۴۰۲ کال په وروستیو څلورو میاشتو کې یو ګرځنده روغتیایي ټیم چې د ورځې ۸ ساعته روغتیایي خدمات به یې وړاندې کول، دلته راته، خو د ۱۴۰۳ کال له پیله یې قرارداد پای ته رسېدلی چې د دې سیمې خلک ټول له روغتیایي خدماتو بې برخې دي، موږ له دولته د یوه مجهز روغتیایي مرکز جوړېدو غوښتنه کوو.»
ورته مهال، د منډهپال سیمې قومي مشر ملک خانجان وايي: «موږ خپل ناروغان په موټر کې تر دوه نیم ساعته مزل وروسته لغمان ولایتي روغتون ته انتقالوو چې کله ناکله مو ناروغان د لارې په اوږدو کې یا مړه کېږي او یا د کوما حالت ته رسېږي، له موجوده حکومته مو غوښتنه دا ده چې روغتیایي مرکزونه راته جوړ کړي.»
دوی وايي، په ځلونو یې د لغمان له ولایتي ادارې سره خپلې ستونزې شریکې کړې خو له ژمنو پرته یې بل څه نه دي اورېدلي.
بل لور ته، بیا د دغه ولایت د عامې روغتیا ریاست مسوولین وایي، د یادې سیمې د خلکو ستونزې یې ور رسېدلي او هڅه کوي چې د موسسو په همکارۍ ورته روغتیایي خدمات ورسوي.
د لغمان د عامې روغتیا ریاست رییس ډاکټر سمیعالله عابد پژواک خبري اژانس ته وویل، له ولایتي ادارې او موسسو سره یې د یادې سیمې ستونزې شریکې کړې دي.
نوموړي وویل، تېر کال د یادې سیمې لپاره یو ګرځنده روغتیایي ټیم ځانګړی شوی و چې اوس یې قرارداد پای ته رسېدلی دی.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن