میمنه (پژواک، ۲۵ چنګاښ ۱۴۰۳): فاریاب کې ځایي سرچینې وایي چې د دغه ولایت په مرکز میمنې ښار کې یو ملکي وګړی په ډزو وژل شوی دی.
د فاریاب د اطلاعاتو او فرهنګ رییس مولوي شمسالدین محمدي وویل چې نن له غرمې مخکې د دغه ولایت په مرکز میمنې ښار کې د خیرمحمد په نوم یو ملکي کس د شېرمحمد له خوا د وسلې په ډز وژل شوی دی.
نوموړي زیاته کړه، مقتول د دغه ولایت د پښتونکوټ ولسوالۍ د تیلان اوسېدونکی و او قاتل هم د دغه ځای دی.
د فاریاب د اطلاعاتو او فرهنګ رییس د دې پېښې انګېزه شخصي دُښمني وبلله او زیاته یې کړه، قاتل له سیمې تښتېدلی خو د امنیتي ځواکونو تر تعقیب لاندې دی.
د مقتول تره زینالله وایي، خیرمحمد نن سهار له کوره ووت، یو ساعت وروسته د امنیتي خواکونو له چکپاینټ سره نږدې د دوو موټرسایکل سپرو له خوا په ډزو وژل شوی دی.
هغه وویل چې موټرسایکلسپاره له سیمې تښتېدلي دي.
نوموړي زیاته کړه: «خیرمحمد د تېر جمهوري نظام د امنیتي ځواکونو غړی و، له بدلون وروسته ایران ته ولاړ او اته میاشتې مخکې بېرته راغلی و، درې لوڼې، شپږ زامن، مېرمن او بوډۍ مور یې بېسرپرسته شول، حکومت باید قاتلین ونیسي او سزا ورکړي.»
Views: 14
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن