خوستښار (پژواک، ۲۸ چنګاښ ۱۴۰۳): د خوست ښاروالۍ له خوا د ۱۸،۵ ميليون افغانيو په لګښت د بيارغونې يوې پروژې چارې پيل شوې.
د مسوولينو په وينا، د بیارغونې دغه پروژه د ښار لوېديځ لور ته د ازادۍ مېنې ښارګوټي کې پلې کېږي.
د خوست ښاروال قاري بسمالله بلال وايي چې په دې پروژه کې د شاوخوا څلورنيم کيلومتره په اوږدوالي په اساسي ډول د ویالو جوړول دي.
نوموړي پژواک خبري اژانس ته وويل چې په دې پروژه کې د ویالو ترڅنګ د ۱۵۴ پلچکونو جوړول هم شامل دي.
هغه زیاته کړه، له دې پروژې سره به چې د راتلونکو شپږو مياشتو په موده کې به بشپړه او کټې اخيستنې ته وسپارل شي، د ياد ښارګوټي د اوسېدونکو ډېرې ستونزې هوارې شي.
د ښاروال په وينا، روان کال د خوست ښاروالۍ د بيارغونې ۳۲ بېلابېلې پروژې په پلان کې لري چې په ښار او ښار ته نږدې سيمو کې به پلې شي.
په همدې حال کې، د ازادۍ مېنې ښارګوټي اوسېدونکي هم وايي چې دا مهال د دغه ښارګوټي زياتره کوڅې او سړکونه په بد حالت کې دي او د ویالو نشتوالي له امله د باران اوبه د دوی کورونو ته ننوځي.
د دغه ښارګوټي یوه اوسېدونکي حاجي منډاير منګل پژواک ته وويل، که څه هم د دې پروژې پر پيلېدو خوښ دی خو زیاتوي چې په نورو برخو کې هم د پروژو پلې کېدو ته اړتيا ليدل کېږي.
د يادې سيمې بل اوسېدونکي محمديوسف وويل، لويه ستونزه چې په دغه ښارګوټي کې موجوده ده، هغه د کاناليزاسيون نشتوالی دی.
هغه زیاته کړه، که ښاروالۍ يې پر وخت غم ونه خوري، ښايي په نږدې راتلونکي کې دوی د څښلو پاکې اوبه ونه لري.
ورته مهال، د خوست ښاروالۍ مسوولين بيا ډاډ ورکوي، هڅه يې دا ده چې د خپلو امکاناتو سربېره د نورو مرستندويه ادارو په همکارۍ هم ښاريانو ته په بېلابېلو برخو کې اسانتياوې رامنځته کړي.
Views: 13
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن