چین کې د ځمک‌ښویېدنې پېښه کې ۱۵ کسان مړه شوي

کابل (پژواک، ۸ زمری ۱۴۰۳): د چین په سوېل‌لوېدیځ کې د سخت ورښت او توپان له امله د ځمک‌ښویېدنې پېښه کې ۱۵ کسان مړه شوي دي.

اسوشېټېډ پرېس راپور ورکړی چې یاده پېښه پرون (یک‌شنبه) نږدې ۸:۰۰ بجې شوې ده.

د راپور له مخې، ممکن په چین کې دغه لومړۍ پېښه وي چې د «ګایمي Gaemi» په نوم له استوايي سره تړاو لري.

چیني چارواکو پرون ناوخته ویلي وو چې توپان مخکې له دې چې دغه هېواد ته ور ورسېږي، په فلیپین کې د موسمي بارانونو د شدت لامل شو او لږ تر لږه ۳۴ کسان په کې مړه شول.

د هغوی په خبره، دغه توپان ټایوان جزیره هم ځپلې او ۱۰ کسان یې وژلي دي.

دا په داسې حال کې ده چې تېره اونۍ هم د ایتوپیا په سوېل کې د سختو ورښتونو په پایله کې د ځمک‌ښویېدنې له امله لږ تر لږه ۲۲۹ کسان مړه شوي وو.