جلالاباد (پژواک، ٢٠ زمری ١٤٠٣): د ننګرهار ولايتي ادارې او سوداګرۍ وزارت په دغه ولایت کې د سوداګرو د ستونزو د حل لپاره په ګډه ځانګړې کمېټه جوړه کړه.
مسوولین وایي، دغه کمېټه به په ننګرهار او ځانګړې توګه تورخم کې د سوداګرو د ستونزو د حل لپاره کار کوي.
د ننګرهار ولايت مقام مطبوعاتي دفتر د زمري په ٢٠مه پژواک خبري اژانس ته په رالېږلې خبرپاڼه کې خبر ورکړی چې دا پرېکړه د ننګرهار مرستیال والي، د سوداګرۍ ریاست، یو شمېر سوداګرو او د صنعت او سوداګرۍ وزارت د پلاوي په ګډه غونډه کې شوې ده.
د خبرپاڼې د معلوماتو له مخې، د ګډې کمېټې د جوړېدو وړاندیز د صنعت او سوداګرۍ وزارت د پلاوي غړي او په دغه وزارت کې د ترانزيټي چارو رییس محمدالله آغا بختيار وکړ.
د خبرپاڼې د معلوماتو له مخې، دغه کمېټه به د سوداګرو او موټرچلوونکو لپاره په تورخم او نورو اړونده سيمو کې سهولتونه رامنځته کړي او د ستونزو په حل کې به بېړني اقدامات ترسره کړي.
د ننګرهار مرستیال والي مولوي سیداحمد بنوري د صنعت او سوداګرۍ وزارت له پلاوي څخه مننه وکړه او د یادې کمېټې د روزنې او فعاليت په برخه کې یې د همکارۍ ډاډ ورکړ.
بلخوا سوداګر د دغې کمېټې جوړېدل د سوداګریزو ستونزو د حل لپاره غوره ګام یادوي.
د ننګرهار د سوداګرۍ خونې د مدیره هیات غړي زلمي عظیمي پژواک ته وویل چې همدا اوس تورخم کې سلګونه لارۍ دواړو خواوو ته بند پاتې دي او د دا ډول کمېټو جوړول کولای شي دا ستونزې حل کړي.
دا په داسې حال کې ده چې درې ورځې مخکې د ننګرهار سوداګرۍ او پانګونې خونې ویلي وو چې په تورخم کې موټرچلوونکو باندې د ویزې حتمي کولو له امله د افغان سوداګرو د خوراکي او غیرخوراکي توکو زر لارۍ دواړو خواو ته بندې ولاړې دي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن