فیضاباد (پژواک، ۲۳ تله ۱۴۰۳): د بدخشان یو شمېر اوسېدونکي وايي، که څه هم د اسلامي امارت په واکمنېدو سره په دغه ولایت کې د وحشي ژوو ښکار د پام وړ کم شوی، خو اوس هم یوه ستونزه ګڼل کېږي او باید د بشپړ درېدو لپاره یې اقدام وشي.
د بدخشان یو اوسېدونکی ظهورالله فخري وایي، د اسلامي امارت له بیا واکمنېدو مخکې د اوبیزو موجوداتو ترڅنګ د مرغانو او وحشي ژوو ښکار په ډېر بېرحمانه ډول تر سره کېده خو په تېرو درېیو کلونو کې د وحشي ژوو پر هر ډول ښکار بندیز لګېدلی دی.
هغه له حکومته غواړي چې په دغه ولایت کې د وحشي ژوو ښکار په بشپړ ډول صفر ته راښکته کړي څو نسل یې بېرته ډېر شي.
د بدخشان یوه بل اوسېدونکي عطاالله هم له اسلامي امارت غوښتنه وکړه چې د وحشي ژوو ښکار مخنیوي برخه کې چې د ورکېدو ګواښ یې شتون لري، جدي اقدامات وکړي.
د دغه ولایت یوه بل اوسېدونکي ایتالله غفراني په دغه ولایت کې د ښکار لاملونه پاکستانۍ جالۍ او ښکاري ټوپک یادوي او له اسلامي امارته د هغو د راټولولو غوښتنه کوي څو د وحشي ژوو ښکار صفر شي.
بلخوا، د بدخشان د کوچني پامیر د درې او غجیر یوه اوسېدونکي نجيالله د دغه ولایت په کوچني پامیر کې د ځينو وحشي ژوو لکه د هوسۍ او مارکوپولو کمېدو لاملونه د واورین پړانګ حملې، لېوان، ډېره واوره ورېدل او د وښو نشتوالی یادوي.
خو بدخشان کې د وحشي ژوو برخې یوه پوه ضیاالحق کامران وایي چې په دغه ولایت کې د نړۍ ۲۵ ډوله وحشي او کمیابه حیوانات شته چې نسلونه یې د واخان ملي پارک ترڅنګ د بدخشان د ټولو ولسوالیو غرونو کې لیدل کېږي.
هغه د ښکار لاملونه د خلکو بېوزلي او د چاپېریال ساتنې له قوانینو د خلکو نه خبرتیا بولي او وایي چې په دې برخه کې د چاپېریالساتنې رضاکارانو له خوا لازم پوهاوی ورکړل شوی او دا لړۍ باید دوام وکړي.
نوموړی وایي چې وحشي ژوي په طبیعت کې ځنځیري تسلسل لري چې د یو ډول په ښکارولو سره نور ډولنه له انقراض سره مخ کېږي.
د واخان ملي پارک کارپوه شېرزي نعیمي وویل چې د وحشي ژوو د ښکار مخنیوي په اړه د سیمې له اوسېدونکو او نظامیانو سره ډېرې ناستې شوې او دوی هم د وحشي ژوو د ښکار مخنیوي ژمنې کړي چې دمګړۍ د واخان غرونو کې له ۱۰۰ تر ۴۰۰ ډوله وحشي حیوانات لکه هوسۍ مارکوپولو، بزرنګ او نخچیري هوسۍ شتون لري.
خو د بدخشان د اطلاعاتو او فرهنګ رییس انجنیر ذبیحالله امیري وایي چې د ملي پارک مربوطاتو کې د وحشي ژوو د ښکار او هوایي ډزو برخه کې اقدامات شوي او په ښکار کې یې د پام وړ کموالی راغلی دی.
هغه بدخشان د هېواد د طبیعي سرچینو او وحشي ژوو ګنج وباله او ویې ویل چې په تېر کې د وحشي ژوو بېرحمانه ښکار د هوسیو د فرار لامل شوی و.
بلخوا، د بدخشان د چاپېریالساتنې رییس قاري فیضالرحمن ابراهیمي وویل چې د بدخشان والي ټولو نظامي او مُلکي بنسټونو ته په قاطع ډول سپارښتنه کړې چې د وحشي ژوو له ښکاریانو سره جدي او قانوني چلند وکړي او سرغړوونکې دې عدلي او قضایي ارګانونو ته معرفي کړي.
Views: 30
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن