فاریاب کې د ترافیکي پېښې له امله څلورو کسانو ته مرګ‌ژوبله اوښتې ده

میمنه (پژواک، ۶ لړم ۱۴۰۳): فاریاب کې ځايي مسوولین وايي چې د دغه ولایت د اندخوی ولسوالۍ په مرکز کې د ترافیکي پېښې له امله یو تنکی ځوان مړ او درې نور کسان ټپیان شوي دي.

د فاریاب امنیې قوماندانۍ ویاند مولوي عبدالله مرادي پژواک خبري اژانس ته وویل چې تېر ماښام د دغه ولایت د اندخوی ولسوالۍ په مرکز کې ترافیکي پېښه شوې دي.

نوموړي زیاته کړه، د اندخوی ولسوالۍ په مرکز کې د دوو موټرسایکلونو ترمنځ ټکر شوی چې په پایله کې یې یو ۱۶ کلن ځوان چې د یوه موټرسایکل چلوونکی و، مړ شوی او درې نور ځوانان چې ۱۹ او ۲۰ کلن وو ټپيان شوي دي.

د فاریاب د اندخوی ولسوالۍ اوسېدونکی محمدنسیم وايي چې پر یوه موټرسایکل درې کسان سپاره وو او پر بل یو کس چې د ډېر سرعت له امله یې ټکر کړی دی.

بلخوا، د اندخوی ولسوالۍ د روغتون مسوول ډاکټر سنجر عمر د ټپیانو روغتیایي وضعیت د اندېښنې وړ بللی.