کابل (پژواک، ۱۰ لړم ۱۴۰۳): د اسلامي همکاریو سازمان وايي، د افغانستان لپاره د دغه سازمان مرستیال او ځانګړي استازي له پاکستاني چارواکو سره د افغانستان په اړه خبرې کړې دي.
د اسلامي همکاریو سازمان د یوې اعلامیې په خپرولو ویلي چې د افغانستان لپاره د دغه سازمان مرستيال او ځانګړي استازي طارق علي بخیت په اسلاماباد کې د پاکستان د بهرنيو چارو وزارت له مرستيالې امنې بلوچ او د افغانستان او لوېدیځې اسیا په چارو کې د دغه وزارت د مرستيال احمدنسيم وریچ سره لیدلي دي.
سرچينې زياته کړې، په دې لیدنه کې دواړه لوري د افغانستان د سياسي، اقتصادي او بشري مسايلو په ګډون د دوه اړخيزو ګټو په اړه غږېدلي دي.
دغه سازمان زیاته کړې، دواړو لورو په افغانستان کې د ثبات او پرمختګ لپاره د همغږۍ، مشورې او همکارۍ پر دوام ټینګار کړی دی.
بلخوا، په خبرپاڼه کې راغلي چې طارق علي بخیت له احمدنسیم وریچ سره له افغانستان سره د تعامل په موخه د بېلابېلو نړۍوالو ناستو د پیاوړتیا او پراختیا پر امکاناتو خبرې کړې دي.
د اسلامي همکاريو سازمان ویلي، بخيت د اسلامي پراختيايي بانک (ISDB) په ملاتړ د افغانستان د بشري مرستو د وجهي صندوق (AHTF) د پياوړتيا پر اهمیت ټينګار کړی دی.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن