د روسیې پارلمان د ممنوعه ډلو له لېسته د طالبانو نوم ایستلو لپاره رایه ورکړې ده

کابل (پژواک، ۲۱ لېندۍ ۱۴۰۳): رويټرز خبري اژانس راپور ورکړی چې د روسیې پارلمان یوه لایحه تصویب کړې چې له مخې یې د ممنوعه ډلو له لېسته د طالبانو نوم ایستلو زمینه برابروي.

دغه اژانس د انټرفاکس خبري اژانس له قوله راپور ورکړی چې د روسیې پارلمان یاده لایحه د قانون له درېیو پړاوونو په یوه کې تصویب کړې ده.

د دې لپاره چې دا تصویب شوې لایحه پر قانون بدله شي، د سنا تصویب ته اړتیا لري او د روسیې ولسمشر باید هغه توشيح هم کړي.

د روسیې پارلمان په داسې حال کې دغې لایحې ته مثبته رایه ورکړې چې دوه اونۍ مخکې د دغه هېواد د ملي امنیت شورا منشي سرګي شویګو په مشرۍ یو پلاوی کابل ته راغلی و او د اسلامي امارت له مسوولینو سره یې لیدنې وکړې.

د اسلامي امارت چارواکو کابل ته د روسیې د ملي امنیت شورا د منشي سرګي شویګو د سفر په ترڅ کې له مسکوه د سیمې په ټولو ناستو کې د افغانستان د معناداره حضور غوښتنه کړې وه.

تر اوسه هيڅ هېواد اسلامي امارت پر رسمیت نه دی پېژندلی خو د روان کال په ترڅ کې قراقستان او قرغیزستان د ترهګرو ډلو له لېسته د طالبانو نوم حذف کړ.

 د یادونې ده، روسیې په ۲۰۰۳ کال کې اسلامي امارت د ترهګرو ډلو په لېست کې شامل کړ خو له تېرو درې‌نیمو کلونو راهیسې له افغانستان سره نږدې اړیکې لري او په کابل کې یې خپل سفارت پرانیستی دی.