د کونړ اوسېدونکي دغه ولایت کې د مناګي برېښنا بند د فعالولو غوښتنه کوي

اسعداباد (پژواک، ۳ مرغومی ۱۴۰۳): د کونړ یو شمېر اوسېدونکي وايي، له تېرو درېیو کلونو راهیسې د ځینو ستونزو له امله د مناګي برېښنا بند له فعالیته لوېدلی او غوښتنه کوي چې حکومت دې هر څه ژر د دغه بند د بیا فعالولو چارې پيل کړي.

د دغه ولایت یو شمېر اوسېدونکي له اسلامي امارته غواړي چې کونړ کې د یاد بند پاتې چارې بشپړې کړي څو دغه ولایت کې د برېښنا کمښت ستونزه ورسره تر یوه بریده حل شي.

د کونړ په وټه‌پور ولسوالۍ کې د پیج درې پر سیند د مناګي برېښنا کوټ چې د ۱,۲ مېګاواټ برېښنا د تولید ظرفیت به ولري په ۱۳۹۲ کال کې یې د جوړېدو چارې د ۸ اعشاریه ۹ میلیونه امریکایي ډالرو په لګښت پیل شوې وې. دغه بند یو ځل د تېر حکومت په وروستیو کې فعال شو خو دا چې چارې یې نه وې بشپړې شوې، له تېرو درېیو کلونو راهیسې له فعالیته لوېدلی دی.

یو کال مخکې د اسلامي امارت د وزیرانو شورا د اقتصادي کمېټې د پرېکړې پر اساس، د مناګي برېښنا بند د نیمګړو چارو د بشپړولو لپاره ۳ اعشاریه ۶ میلیونه افغانۍ بودجه ځانګړې شوه چې ټاکل شوې وه د څلورو میاشتو په موده کې به یې چارې بشپړې شي خو لا پیل شوې هم نه دي.

د کونړ د مرکز اسعداباد ښار اړوند د دوشاخیلو سیمې اوسېدونکي قومي مشر نورالرحمن د یاد بند په اړه وویل، د کونړ خلک لاهم په پرېمانه اوبو کې برېښنا نه‌ لري چې حکومت باید په بنسټیزه توګه دا ستونزه حل کړي.

هغه زیاته کړه: «د مناګي برېښنا بند د فعالولو او نیمګړو چارو د بشپړولو لپاره د اوسني حکومت مشرتابه بودجه ځانګړې کړه او اعلان یې وکړ چې په څلور میاشتو کې به یاد برېښنا بند فعال کړي خو دا دی یو کال پوره شو، لاهم دا برېښنا بند هماغسې غیرفعال پاتې دی.»

دغه راز، د اسعداباد د کرهالې سیمې اوسېدونکي محمدعارف وویل، د مناګي برېښنا بند چې نږدې یوه لسیزه مخکې د مخکیني حکومت پرمهال یې د جوړلو چارې پیل شوې وې، تر اوسه نه دي بشپړې شوې.

هغه وویل: «په تېر نظام کې که فساد نه وای، نو دغه برېښنا کوټ به په خپله ټاکلې موده کې ګټې اخیستنې ته سپارل شوی و، اوس مو له حکومته غوښتنه دا ده چې دغه بند راته ژر فعال کړي؛ ځکه په دومره پرېمانه اوبو کې موږ لا هم بې‌برېښنا یو.»

د یادونې وړ ده چې شاوخوا یو کال مخکې د کونړ د برېښنا رییس شهاب‌الدین یاسر پژواک خبري اژانس ته ویلي وو، د ولایتي ادارې په هڅو او د مرکزي حکومت په خاصې پاملرنې د افغانستان د برېښنا شرکت د تخنیکې ډلې له لوري د مناګي برېښنا بند د ترمیم او اساسي جوړونې چارې په عملي توګه پیل شوې چې په څلورو میاشتو کې به بشپړې شي.

پژواک هڅه وکړه چې د یاد بند د چارو په تړاو د دغه ولایت د برېښنا ریاست د مسوولینو تازه نظر واخلي خو له بار- بار هڅو سره خبرو ته حاضر نشول.

د دغه ولایت د برېښنا ریاست د مسوولینو په خبره، د مناګي برېښنا بند د جوړېدو قرارداد د تېر حکومت پرمهال د «امین ساپي» په نوم له یوه ساختماني شرکت سره شوی و چې اوس ورسره قرارداد لغوه شوی او ټولې چارې یې د برېښنا عمومي ریاست پر غاړه اخیستې دي.