کابل (پژواک، ۳ مرغومی ۱۴۰۳): د ټولګټو وزارت په تېره یوه میاشت کې د افغانستان د څلورو بندرونو اوسپنې پټلیو له لارې د ۴۵۲ زره او ۱۳۲ مټریک ټنه توکو د انتقالاتو خبر ورکوي.
د یاد وزارت ویاند محمداشرف حقشناس نن پر خپله اېکسپاڼه لیکلي چې یاده اندازه انتقالات د روان ۱۴۰۳ لمریز کال په تېره لېندۍ میاشت کې شوي دي.
هغه زیاته کړې، یاده موده کې د حیرتان بندر له لارې ۳۴۹ زره او ۵۹۹ ټنه، د اقینې بندر له لارې ۲۵ زره او ۶۳۰ تنه، د تورغونډۍ بندر له لارې ۷۴۷۰۱ ټنه او د خواف - هرات له لارې ۲۲۰۲ ټنه انتقالات شوي چې ټول ۴۵۲ زره او ۱۳۲ مټریک ټنه کېږي.
سرچینه زیاتوي، په انتقالاتو کې نفتي، غیرنفتي او نور توکي شامل دي.
د سرچینې په حواله، په دغو انتقالاتو کې ۷۷۷ ټنه صادراتي توکي وو چې لویه برخه یې وچه مېوه او د انارو جوس جوړوي.
د سرچینې په خبره، هر څومره چې د اوسپنې پټلۍ له لارې د صادراتو او انتقالاتو کچه لوړېږي، په هماغه اندازه کاري فرصتونه برابرېږي، ملي عواید زياتېږي او په ټوله کې اقتصادي ثبات، ترقۍ او ځان بسياينې ته لار هوارېږي.
سرچینه کاږي، ټولګټو وزارت هڅه کوي څو د لا زیاتو انتقالاتو لپاره مناسب شرایط برابر او سوداګرو ته لا زياتې اسانتياوې برابرې کړي.
د ټولګټو وزارت د معلوماتو له مخې، د روان ۱۴۰۳ لمریز کال په تېره لړم میاشت کې د افغانستان د څلورو بندرونو اوسپنې پټلیو له لارې ۴۵۲ زره او ۳۱ مټریک ټنه انتقالات شوي دي.
GET IN TOUCH
NEWSLETTER
SUGGEST A STORY
PAJHWOK MOBILE APP