تېرو ۲۴ ساعتونو کې غزه کې ۸۸ کسانو ژوند له لاسه ورکړی

کابل (پژواک، ۱۷ مرغومی ۱۴۰۳): تېرو ۲۴ ساعتونو کې غزه کې د اسرائیل په هوايي بریدونو کې ۸۸ کسانو ژوند له لاسه ورکړی او ۲۰۸ نور ټپیان شوي دي.

عربي رسنیو راپور ورکړی چې په غزه کې د کډوالو پر جبلیا کمپ د اسرائیلي ځواکونو په تازه هوايي بریدونو کې لسګونه کورونه ویجاړ شوي، د غزې په مرکز کې د نصیرات په نوم د کډوالو پر کمپ هم برید شوی او په خان‌یونس کې پر یوه ودانۍ د برید لپاره له بې‌پیلوټه الوتکې کار اخیستل شوی دی.

د فلسطیني رسنیو د شمېرو له مخې، د ۲۰۲۳ کال په ۷مه د اسرائیل او حماس ترمنځ د بریدونو له پیل راهیسې تر اوسه، ۴۵ زره او ۵۰۸ کسانو ژوند بایللی او څه باندې ۱۰۰ زره نور ټپيان شوي دي.

له دې مخکې د ملګرو ملتونو د فلسطیني کډوالو په چارو کې د ملګرو ملتونو د ادارې رییس فیلیپ لازاریني پر الموسوي بشردوستانه سیمې د اسرائیل برید ته په غبرګون کې وویل چې په غزه کې هېڅ امن ځای نشته.

د یادونې ده چې د اسرائیلو په بریدونو کې د غزې ډېره برخه پر ویجاړیو بدله شوې او د دې ترانګې نږدې ټول ۲.۳ میلیون وکړي یې د خپلو کورونو پرېښودو ته اړ کړي دي.