کابل (پژواک، ۲۹ مرغومی ۱۴۰۳): د علومو اکاډمۍ له لوري کابل کې د حضرت ضیاء المشایخ محمد ابراهیم جان مجددي د شهادت د ۴۶ تلین په یاد غونډه جوړه شوه.
د افغانستان د علومو اکاډمۍ رییس شېخ الحدیت مولوي فریدالدین محمود د غونډې د پرانیستې پرمهال وویل چې محمد ابراهیم جان د علم لویه هستي، نېک شخصیت او لوی عالم و.
د هغه په وینا، د ۱۳۵۷ لمریز کال د مرغومې میاشتې په ۲۸مه هغه د خپلې کورنۍ له غړو او شاوخوا ۳۷۰ نورو کسانو سره یو ځای په شهادت ورسېد.
دغه راز، د لوړو زدهکړو وزارت سرپرست شېخ مولوي نداء محمد ندیم په دغه غونډه کې وویل، افغانستان په خپل تاریخ کې تل ښه او پر علم سمبال شخصیتونه درلودل.
ندیم زیاته کړه، د افغانستان خلکو او لیکوالانو ته په کار ده چې پر علماوو د بې اعتمادۍ فکر او عقیده له منځه یوسي.
د اوبو او انرژۍ وزارت د دفتر رییس مولوي محمد عزیز وویل، په کار ده چې د افغانستان د شخصیتونو یاد په تاریخ او لیکنو کې ژوندی وساتل شي.
د ریاستالوزراء د دفتر رییس مرستیال قاري عبدالستار سعید وویل چې محمد ابراهیم جان مجددي نه یوازې د افغانستان، بلکې د نړۍ په کچه جید عالم و چې په خپلو پراخو علمي، اصلاحي، تدریسي او عرفاني علم یې خلکو ته خدمتونه کړي دي.
دی واي، د هغه د بېلابېلو علمي او اصلاحي خدمتونو ثمره تر اوسه احساسېږي او هېڅوک یې له شان سترګې نه شي پټولی.
د افغانستان د علومو اکاډمۍ د معلوماتو له مخې، محمد ابراهیم جان مجددي په ۱۳۲۰ هجري قمري کال کې د هېواد پلازمېنه کابل کې زېږېدلی، دی د خپل وخت یو پیاوړی دیني عالم و، د ضیاء المشایخ په لقب ونازول شو او په ۱۳۵۷ لمریز کال د مرغومې میاشتې په ۲۸مه د وخت شورویانو له خپل کوره وایست او بیايې په شهادت ورساوه.
GET IN TOUCH
NEWSLETTER
SUGGEST A STORY
PAJHWOK MOBILE APP