حج او اوقافو وزارت له یوه شرکت سره د حج بهیر کې د خدماتو وړاندې کولو تړون لاسلیک کړ

کابل (پژواک، ۲۰ مرغومی ۱۴۰۳): د ارشاد، حج او اوقافو وزارت وايي چې د دغه وزارت یوه پلاوي د سعودي عربستان په مکه معظمه ښار کې له یوه شرکت سره د حج بهیر کې د خدماتو وړاندې کولو تړون لاسلیک کړ.

یاد وزارت نن پرخپله اېکس‌پاڼه لیکلي: «د افغانستان اسلامي امارت د ارشاد، حج او اوقافو وزارت باصلاحیته هیئت د سعودي عربستان په مکې معظمې ښار کې له جنوب اسیا (ضیوف البیت) مؤسسې سره د ۱۴۴۶ هجري قمري کال د حج پروسې په تړاو د خدماتو وړاندې کولو قرارداد لاسلیک کړ.»

سرچینې زیاته کړې، د ارشاد، حج او اوقافو وزارت مسوولینو په سعودي عربستان کې له بېلابېلو موسسو او شرکتونو سره تر لیدنو او مجالسو وروسته، د را روان حج په تړاو د غوره خدماتو وړاندې کولو تړون له ضیوف البیت شرکت سره تېره ورځ لاسلیک کړ.

سرچینه زیاتوي، یاد شرکت مکلف دی چې د افغان حاجیانو لپاره په مقدسو مشاعرو کې ټول اړین خدمات له تړون سره سم په ښه کیفیت او کمیت وړاندې کړي.

د سرچینې د معلوماتو له مخې، دغه شرکت په منیٰ، عرفات او مزدلفه کې د خدماتو د وړاندې کولو په برخه کې اوږده تجربه لري.