ابونصر فراهي بندر کې باروړونکو موټرو ته د ترمینل جوړولو چارې پیل شوې

فراه‌ښار (پژواک، ۷ سلواغه ۱۴۰۳): د فراه په شيخ ابونصر فراهي بندر کې د ۴۰ میلیون افغانیو په لګښت د لویو باروړونکو موټرو لپاره د یوه معیاري ترمینل جوړولو چارې پيل شوې.

دا څرګندونې په هغې خبرپاڼې کې شوې چې د فراه د اطلاعاتو او فرهنګ ریاست له لوري رسنیو ته استول شوې ده.

سرچینه وايي چې د دغه ولایت په شيخ ابونصر فراهي بندر کې د ۴۰ میلیون افغانیو په لګښت د لویو باروړونکو موټرو لپاره د یوه معیاري ترمینل جوړولو چارې پيل شوې.

سرچینه وايي چې دغه ترمینل پر زر جریب ځمکه د شپږو میاشتو په موده کې په اساسي بڼه جوړیږي.

خبرپاڼه زیاتوي چې د دغه ترمينل په جوړېدو سره به موټرچلوونکو، ملي سوداګرو او باروړونکو موټرو ته اړینې اسانتیاوې رامنځته شي.

د یادونې ده، له دې مخکې هم په یو شمېر نورو ولایتونو کې د ورته ترمینلونو جوړېدو چارې پيل شوې دي.