خیرخواه: نړۍ دې د فرهنګي میراثونو ساتنې په برخه کې له افغانستان سره مرسته وکړي

کابل (پژواک، ۲۵ سلواغه ۱۴۰۳): د اطلاعاتو او فرهنګ وزارت سرپرست د ناروې له شارژدافیر سره په لېدنه کې ویلي، د فرهنګي میراثونوساتنه یوازې د افغانانو دنده نه؛ بلکي دا د ټولي نړۍ دنده ده چې په دې برخه کې له افغانستان سره همکاري وکړي.

د اطلاعاتو او فرهنک وزارت په خبرپاڼه کې راغلي چې د دغه وزارت سرپرست ملا خیرالله خیرخواه په کابل کې د ناروې شارژدافیر البرټالساس سره وکتل.

خبرپاڼه کې راغلي، په یاده لیدنه کې دواړو لوریو د افغانستان او ناروې تر منځ د اړیکو ترڅنګ په کلتوري مسایلو خبرې وکړې.

د اطلاعاتو او فرهنګ وزارت سرپرست په دغه لېدنه کې ویلي، تاریخي ځایونه او کلتوري میراثونه یوازې د افغانستان نه بلکي د بشریت کلتوري میراثونه دي چې اکثره یې ساتنې او ترمیم ته اړتیا لري.

هغه ویلي د کلتوري میراثونو ساتنه یوازې د افغانانو دنده نه؛ بلکي دا د ټولي نړۍ دنده ده چې په دې برخه کې د افغانستان سره همکاري وکړي.

د ناروې هېواد شارژدافیر هم ویلي، د اړوند ادارو او مؤسسو سره به په دې برخه کې همغږي وکړي او د خپل هیواد له لورې یې له افغانستان سره په بېلابېلو برخو کې د همکاریو د دوام پر اهمیت ټینګار وکړ.