اسلامي امارت یو امریکايي بندي خوشی کړ

کابل (پژواک، د وري لومړۍ نېټه ۱۴۰۴): کابل ته د امریکايي پلاوي له سفر وروسته، د افغانستان بهرنیو چارو وزارت د یوه امريکایي بندي جورج ګلزمن د خوشي کولو خبر ورکړی او ویلي یې دي چې دغه امریکايي وګړی د اسلامي امارت له لوري د یوه «بشردوستانه اقدام په توګه» خوشی شوی دی.

د دغه وزارت په خبرپاڼه کې راغلي: «د ټول مسایلو لپاره د خبرو، تفاهم او ډیپلوماسۍ له لارې د حل لاره پیدا کېدای شي او د دغه امریکايي وګړي خوشي کېدل هغه ګام دی چې د حسن نیت پر بنسټ اخیستل شوی چې ښيي اسلامي امارت د درناوي او ګډو ګټو له مخې، له ټولو خواوو په ځانګړې توګه د امریکا له متحده ایالتو سره رښتینی تعامل ته چمتو دی.»

د افغانستان بهرنیو چارو وزارت د جورج ګلزمن د خوشي کولو په قضیه او «د اسلامي امارت او امریکا ترمنځ د قضیې په مسلې حل کولو» کې د متحده عربي اماراتو او قطر له منځګړیتوبه مننه کړې ده.

ورته وخت کې، د امریکا د بهرنیو چارو وزارت په یوه اعلامیه کې د جورج ګلزمن خوشي کېدل یو «مثبت او رغنده ګام» بللی او زیاته کړې یې ده چې لا هم په افغانستان کې نور امریکایان بندیان دي.

دغه وزارت هم د جورج ګلزمن په خوشي کولو کې د قطر د رول ستاینه کړې او ویلي یې دي چې دوحې یو ځل بیا ثابته کړه چې په پېچلو خبرو اترو کې د باور وړ شریک او منځګړی دی.

د یادولو ده چې جورج ګلزمن پرون (پنج‌شنبه) کابل ته د امریکايي پلاوي له سفر وروسته د اسلامي امارت له لوري خوشی شو.

د زندانیانو په چارو کې د امریکا د ولسمشر ځانګړي استازي ادام بویلر او د زلمي خلیلزاد په ګډون ورسره مل پلاوي کابل ته د سفر پر مهال د بهرنیو چارو وزارت له سرپرست امیرخان متقي سره وکتل.

د بهرنیو چارو وزارت د خبرپاڼې پر بنسټ، په دې لیدنه کې د افغانستان او امریکا ترمنځ پر دوه اړخیزو اړیکو، د بندیانو پر خلاصون او په امریکا کې افغانانو ته د کنسولي خدمتونو وړاندې کولو په اړه خبرې وشوې او متقي زیاته کړې، دا ډېره مهمه ده چې افغانستان او امریکا وکولای شي مسایل د خبرو له لارې حل کړي.

د افغانستان د سولې په چارو د امریکا مخکني ځانګړي استازي زلمي خلیلزاد د دغه امریکايي وګړي له خوشي کېدو وروسته پر ایکس‌پاڼه ټینګار وکړ چې ولسمشر ټرمپ له هېواده بهر د بندیانو خوشي کېدو او بېرته ستنېدو ته لومړیتوب ورکړی دی.

د راپورونو له مخې، جورج ګلزمن د ۲۰۲۲ کال په ډسمبر میاشت کې په افغانستان کې نیول شوی و.

سي ان ان: د یوه افغان بندي په بدل کې دوه امریکایان خوشي شوي دي

د امریکايي رسنیو د خبر له مخې، له افغان بندي خان محمد سره په تبادله کې دوه امریکايي وګړي، راین کوربېټ او وېلیم مک‌کېنټي خوشې شوې دي.

یو افغان بندي له امریکایي اتباعو سره په تبادله کې له بنده ازاد شو

د افغانستان بهرنیو چارو وزارت وايي، د ا.ا او امریکا ترمنځ د اوږدو او ګټورو مذاکراتو په پایله کې په امریکا کې یو افغان بندي خان‌محمد له امریکایي اتباعو سره په تبادله کې له بنده ازاد او هېواد ته راولېږدول شو.

سي‌اېن‌اېن: امریکا له درېیو امریکایانو سره د یوه افغان بندي د تبادلې وړاندیز کړی

د سي‌اېن‌اېن د راپور له مخې، امریکا ګوانتانامو کې د یوه افغان بندي د خوشي کولو په بدل کې افغانستان کې «د درېیو بندي امریکایانو» د خوشي کولو وړاندیز کړی.