کابل (پژواک، ۱۹ مرغومی ۱۴۰۳): د سياېناېن د راپور له مخې، امریکا ګوانتانامو کې د یوه افغان بندي د خوشي کولو په بدل کې افغانستان کې «د درېیو بندي امریکایانو» د خوشي کولو وړاندیز کړی.
سياېناېن د یوې سرچینې له قوله د یادو څرګندونو تر څنګ لیکلي چې د امریکا متحده ایالتونو په تېرو څو میاشتو کې افغانستان کې د درېیو امریکایي بندیانو (رایان کوربټ، جورج ګلېزمن او محمود حبیبي) د خوشي کولو په اړه خبرې کړې دي.
سرچینه زیاتوي چې یاد درې کسان په ۲۰۲۲ کال کې په افغانستان کې نیول شوي دي.
د راپور له مخې، امریکا وړاندیز کړی چې یاد درې کسان په ګوانتانامو کې د بندي افغان محمدرحیم افغاني سره تبادله شي.
خو سرچینه د جزییاتو له ورکولو پرته زیاتوي چې اسلامي امارت د محمدرحیم او دوو نورو کسانو د خوشي کولو غوښتنه کړې ده.
د امریکا د ملي امنیت شورا ویاند د یاد وړاندیز جزییات نه دي تایید کړي، خو ویلي یې دي هڅې روانې دي چې جورج، رایان او حبیبي خوشي شي.
د راپورونو له مخې، له دې مخکې د افغانستان لپاره د امریکا ځانګړي استازي ټوماس وېست هم ویلي وو چې جورج ګزمن، محمودشاه حبیبي او ریان کوربېټ هغه درې امریکایي اتباع دي چې له اسلامي امارت سره بندیان دي.
افغان چارواکو تر اوسه د سياېناېن د دغه خبر په اړه څه نه دي ویلي، خو د اسلامي امارت ویاند ذبیحالله مجاهد د روان کال د زمري په میاشت کې ویلي وو چې په افغانستان کې یوازې دوه امریکايان بندیان دي او اسلامي امارت چمتو دی څو امریکا کې د بندي افغانانو د تبادلې په صورت کې یې خوشي کړي.
مجاهد ویلي وو چې د محمودشاه حبیبي په نوم کس له اسلامي امارت سره نه دی بندي.
